Auxtin Zamorari omenaldia

Josu Jimenez-Maia ren hitzaldia

Sofokles greziarrak zionez, ''Espero ez den poza baino poza haundiagorik ez da ''

Poza handiz biltzen gara urtero hemen, Larraldean eta aurten ere espero izateko poza hartu dugu berriz ere lagun zaharrak ikustean, eta baita lagun berriak egitean ere. Egia da Hatsaren Egunaren karietara batzuk elkar ikusten dugula soilik urtean behin ; egia da ,bestalde , Hatsaren Egunean ezagututako lagun bat beste nonbait topatzean – Hatsaren poesiak emandako poza espero gabe berritua- ematen duela poza haundia. Are poza handiagoa ematen du lagun berriak egiteak,urterik urte Hatsaren poesiaren arrimora beti aurpegi berriren bat , hats berriren bat , gehitzen zaiolako taldeari.

Eta taldea diot, oso talde sui generis izanik ere, eta taldea bada batez ere Auxtinek egindako lan eskergarriari esker izan da, hori bai dela pozgarria, Auxtin Zamora izatea den bezalakoa, langile fina eta umila,euskaltzale suharra eta eskuzabala. Espero ez den poza baino poza handiagorik ez da zioen Sofokles zaharrak, eta egia bada eta gure azpilanaren oihartzunik heldu ez bazaio gure lagunari, espero ez duen opari xume bat eman nahi diogu Hatsaren buru , beso, bihotz eta giharra den Auxtin Zamorari.

Ainara Maiaren lekukotasuna

HATSAREN POESIA 18 urtez euritan nahiz ateri

gure eskerrik beroenak

nahi dizkizugu zuri,

Auxtin ageri

Gure irribarrerik zintzoenak

gaurko eguna argi dezagun maitasunez ia eri.

Oxtikenian hats hartu nuen lehenbizikoz,

poeta ilustre ta ezezagun artean gureasoekin joan nintzen 2001ean

eta Larradera lekutu ginen gero,

arnas sakon hartu ta elkarri hats ematen segitzeko,

oxtikenetik larraldera,

hats eman ta hartuz laketu gara

**************************

Eneritz Abruza-ren lekukotasuna

Non gure sormenaren arima

biluztuz Senpereko larreetan,

sentipenak hitz bilakatuz eta hitzak kantu .

***********************************

Juankar L.Mugartza-ren lekukotasuna

Gaua zelarik

argi bat ikusi genuen izar itzalien artean

itzalen atzean

poesiaren maitale ginenok

inork ere bere babesa ematen ez zigun umezurtz hauek

Eta argia erakutsi zigun agian ez

baina olerkariak

Euskal olerkariak ginela

berari esker

********************************************

Begoña Zestau-ren lekukotasuna

Umiltasunetik sakonenean, bizkorrenean ;

Ixiltasunetik adierazkorrenean,

gure esanak eta esanahiak apal-apal jaso,

eta, urtero-urtero , emozioen zirraraz gozatzeko bidea ireki zigun ;

Bere begien urdina eta irriparra bidelagun izanik .

****************************************************

Ima Zeztauen lekukotasuna

Txapela azpian

Mundua agerian

Auxtin du izena

Zamora abizena.

Biziaren ikuskera

Muga askoren gainera

******************

Josu Jimenez Maiaren lekukotasuna

Isiltasuna ez da sekula hutsa

ez hutsaren hurrengoa

ez hutsala .

Idatzi ez dudana

idatzi nahi dudana da..

Lan isiletik sortzen da Hatsa

norberaren hats, hitz bihurtua,

Auxtini esker , urteroko hitzordua

hutsik egin gabe.

Eta isil nadin,isiltasuna ez baita sekula hutsa

ez hutsaren hurrengoa

ez hutsala.

Marisa Arruabarrena-ren lekukotasuna

Amildegi ertzean nengoelarik

ezagutu nuen Auxtin

Eta orduan

iluntasun garratza

argi bihurtuz

eta mina

xamurtuz...

Ireki zizkidan Larraldeko

leiho eta ateak.
Eta orain

nola eskertu bere lana ?

Nola esan maite dugula ?

Ba dakigun modu bakarrean...

Aupa zu Auxtin !

************************

Tere Irastorzaren lekukotasuna

Norberarentzat bakarrik ez diren hitzak

denon hats bihurtzen dira.

Arnas hori poesiaren hasiera,

eta Agustin, zu hats emaile lehena

****************************

Agurtzane Anduetza-ren lekukotasuna

Irrintzi bat entzun da,

Mendi tontorrean.

Goazen olerkari danok,

Bertso baten atzean...

Mila esker Auxtin,

irrintzi eta olerkia

izateagatik..

***************

Juan Mari Apaolaza ren lekukotasuna

Urrutira begiratu, eta bertan arakatu

erlatibitateak bakoitzaren denbora luzatzen du

zuk poesian topatu duzu aurrera salto egiteko leku

konturatzerako, denbora asko irabazi arazi diguzu

Argazkia ulertzen duzu

argazki bakoitzak daramana idatziz askatzen duzu

gordetako denbora zatiak hitzez finkatzen dituzu

zuri esaten bai dizute, guri kontatu diezaguzuna

Poesiaz eta argazkiez lotzen gaituzu Hatsan

gustura hartzen dugu zure gonbita

jakin izan duzu nola eraiki

bestela galduko ziren gure kontuekin

Auxtin Zamorari omenaldia

************************

Leire Zabala-Telleriaren lekukotasuna

Mozkutik

Mila esker eta eskerrik hanitx

Auxtin Zamora-ri

Hatsa elkarteraren bidez euskaldunon artean,

euskara, poesia eta bizitza elkarbanatzen laguntzea gatik ,

bai Euskal Herrian bai atzerrian.

*********************************************

Joanmari Irigoienen lekukotasuna

Milesker zuri, Auxtin,

Hatsaren hats,

eta milesker zure inguruan dabilen jende horri,

jende xaloa eta apala,

jende sanoa,

lan isilari esker

Poesiaren Eguna

urtean behin

posible egiten duena,

urtean behin

Lurra Zeru bihurtzen

laguntzen diguna…

baita Zerua Lur ere, hainbatetan,

zeren poesia Lurra den eta Zerua den,

irria eta haserrea,

errealitate magikoa eta errealitate gordina,

matxura existentziala eta jainkozko miraria,

denbora eta desdenbora:

gora Auxtin Zamora!

Altzan, 2016ko urtarrilaren 16an